Beton në vend të terrenit sportiv: Salla e papërfunduar që ngre pikëpyetje për premtimet e Listës Serbe

Mitrovicë e Veriut, 11 shtator 2026 08:35

Një objekt që ishte planifikuar të shërbente si sallë sportive dhe hapësirë për aktivitete të qytetarëve në Mitrovicën e Veriut ka mbetur i papërfunduar prej vitesh.

Në vend të një kompleksi sportiv me fushë, tribuna dhe hapësira për sportistë e të rinj, sot kanë mbetur një strukturë betoni, bimësi e dendur, pjesë të dëmtuara të objektit dhe grafite.

Projekti ishte paraparë t’u krijonte qytetarëve një hapësirë për sport dhe grumbullime, por punimet nuk u përfunduan dhe objekti, me kalimin e viteve, u la në gjendje të amortizohej.

Kjo situatë ka ngritur pikëpyetje te banorët lokalë, të cilët kërkojnë të dinë se sa para publike janë shpenzuar për projektin, kush ishte përgjegjës për zbatimin e tij dhe pse punimet mbetën të papërfunduara.

“E kemi parë këtë ndërtim për vite me radhë dhe pyesim veten se çfarë po ndodh me projektin. U tha se këtu do të ketë një sallë sportive, se fëmijët do të kenë një vend për t’u stërvitur dhe se qytetarët do të kenë një vend për t’u mbledhur. Në fund, mbeti vetëm një ndërtesë e papërfunduar”, tha për Veritasinfo Bojan Saviq, banor që jeton rreth njëqind metra larg objektit.

Edhe ish-zyrtarë komunalë kërkojnë më shumë transparencë për projektin.

“Problemi nuk është vetëm se salla nuk është përfunduar. Problemi është se për vite me radhë askush nuk është përgjigjur se sa para janë shpenzuar dhe pse projekti është braktisur. Nëse ka pasur probleme, qytetarët duhet të dinë se cilat ishin”, tha ish-këshilltarja komunale Ivana Rakiq.

Për arkitektin Aleksandar Kasaloviq, mënyra se si ka përfunduar ky projekt krijon përshtypjen se investimet publike mund të jenë përdorur edhe si mjete për premtime politike.

“Gjëra të tilla lënë përshtypjen se projektet fillojnë për shkak të premtimeve politike dhe, kur koha kalon, të gjithë i harrojnë ato. Nuk kemi nevojë për premtime, por për objekte të përfunduara që u shërbejnë qytetarëve. Nuk besoj se profesioni e krijoi problemin këtu, politika e krijoi problemin”, tha ai

Veritasinfo bisedoi me banorë lokalë dhe ish-zyrtarë komunalë lidhur me këtë projekt. Përfaqësuesit e Listës Serbe, të cilët sipas portalit janë aktualisht në pushtet në komunë, nuk iu përgjigjën pyetjeve lidhur me statusin e objektit, koston e projektit dhe arsyet e mos-përfundimit të tij.

Në mungesë të përgjigjeve zyrtare, objekti mbetet një strukturë e papërfunduar në mes të qytetit, por edhe një pikëpyetje për mënyrën se si janë planifikuar, financuar dhe zbatuar projektet publike në Mitrovicën e Veriut.

Qytetarët kërkojnë të dinë sa ka kushtuar projekti, çfarë fondesh janë shpenzuar dhe nëse ekziston ndonjë plan për përfundimin apo funksionalizimin e tij.