Mijëra të zhdukur dhe miliarda dollarë dëme pas katastrofës në Nepal

Prishtinë, 9 shtator 2026 07:17

Numri i viktimave nga rrëshqitja masive e tokës në Nepal ka kaluar 1 mijë e 350. Nga fatkeqësia e shkaktuar nga një ortek akulli dhe shkëmbinjsh më 26 gusht, janë zhdukur mijëra persona dhe janë shkaktuar dëme të mëdha në banesa, biznese dhe infrastrukturë.

Sipas policisë nepaleze, deri të dielën në mbrëmje janë nxjerrë 1 mijë e 353 trupa, ndërsa 9 mijë e 159 persona të lënduar janë shpëtuar. Rreth 3 mijë e 190 prej tyre janë strehuar në qendra të posaçme. Autoritetet po përdorin edhe testet e ADN-së për identifikimin e viktimave.

Në luginën e Trishulit, banorët dhe bizneset po vlerësojnë humbjet. Qeveria e ka vlerësuar koston e rindërtimit në 4 deri në 5 miliardë dollarë. Rreth 7 mijë e 500 ndërtesa janë shkatërruar, përfshirë 50 objekte qeveritare, ndërsa 13 hidrocentrale dhe një impiant diellor kanë dalë jashtë funksionit.

Përmbytjet kanë prekur më shumë se 30 mijë persona dhe kanë përmbytur sipërfaqe të mëdha bujqësore. Pronarë biznesesh thonë se kanë humbur mijëra dollarë mallra, ndërsa operatorët turistikë kanë raportuar rritje të anulimeve, veçanërisht nga turistët evropianë.

Në disa zona, ushtria po ndihmon banorët të kalojnë lumin Trishuli, pasi përmbytjet shkatërruan rrugët dhe urat. Një kalim i përkohshëm me kabllo është vendosur për të mundësuar lëvizjen e banorëve dhe furnizimeve.

Fatkeqësia ndodhi më 26 gusht, kur shembja e akullnajave solli ujë, shkëmbinj dhe baltë me forcë të madhe në komunitetet përgjatë sistemeve lumore Bhotekoshi dhe Trishuli. Autoritetet vazhdojnë kërkimet për personat e zhdukur dhe përpjekjet për rikuperimin dhe identifikimin e viktimave.