“Kanë 48 orë për të lënë vendin”: Ministri i Jashtëm i BeH dëboi dy zyrtarë të Ambasadës së Serbisë

Ministri i Punëve të Jashtme të Bosnjë-Hercegovinës, Elmedin Konakoviq, njoftoi se ka marrë vendim për shpalljen persona të padëshiruar të dy zyrtarëve të Ambasadës së Serbisë në Bosnjë e Hercegovinë. Ata kanë afat prej 48 orësh për ta lënë Bosnjën.

Bëhet fjalë për Milan Dulanoviq, atasheun e mbrojtjes në Ambasadën e Serbisë, dhe Danko Maksimoviq, këshilltar në Ambasadën e Serbisë.

Konakoviq njoftoi gjithashtu se sot është tërhequr pëlqimi për një deklaratë të përbashkët mbi marrëdhëniet e fqinjësisë së mirë dhe bashkëpunimin rajonal.

“Sot e tërhoqëm pëlqimin për deklaratën e përbashkët mbi marrëdhëniet e fqinjësisë së mirë dhe bashkëpunimin rajonal, e cila duhej të nënshkruhej në Mal të Zi më 1 tetor, në një takim ku do të merrnim pjesë.

Këto deklarata, këto letra boshe, nuk do t’i nënshkruajmë për sa kohë kemi Serbinë që po shohim këto ditë, një Serbi të viteve ’90, e cila vërtet na paralajmëron se gjërat nuk janë normale. Mendojmë se kjo nuk është e përshtatshme”, deklaroi Konakoviq.