FSK-ja nënshkruan marrëveshjen për pjesëmarrje në Forcën Ndërkombëtare Stabilizuese në Gaza

Prishtinë, 7 shtator 2026 12:44

Forca e Sigurisë së Kosovës (FSK) do të marrë pjesë në Forcën Ndërkombëtare Stabilizuese në Gaza (ISF), pas nënshkrimit të Marrëveshjes së Participimit ndërmjet përfaqësuesve të Bordit të Paqes/ISF Gaza dhe Komandantit të FSK-së, gjenerallejtënant Bashkim Jashari.

Marrëveshja u nënshkrua gjatë vizitës zyrtare në Kosovë të komandantit të ISF-së për Gazën, gjeneralmajor Jasper Jeffers, dhe stafit të tij. Në ceremoninë e nënshkrimit morën pjesë edhe ministri i Mbrojtjes, Ejup Maqedonci, si dhe përfaqësues të Bordit të Paqes.

Jeffers e vlerësoi vendimin dhe gatishmërinë e Kosovës për të kontribuar në këtë mision ndërkombëtar, duke theksuar rëndësinë e kontributit të FSK-së në përpjekjet për paqe, siguri dhe stabilitet.

Ai shprehu mirënjohje për institucionet e Kosovës dhe përkushtimin e tyre në mbështetje të misionit në Gaza.

Ndërkaq, komandanti i FSK-së, Bashkim Jashari, tha se pjesëmarrja në misionet ndërkombëtare të sigurisë është pjesë e vizionit të Kosovës për të dhënë kontribut konkret në promovimin e paqes dhe sigurisë ndërkombëtare.

Sipas Jasharit, FSK-ja synon të rrisë vazhdimisht kontributin e saj në sigurinë ndërkombëtare, me objektivin strategjik që Kosova të kalojë nga një “importuese e sigurisë” në një “eksportuese të saj”.

Nënshkrimi i marrëveshjes paraqet një hap të rëndësishëm për Kosovën në zgjerimin e rolit të saj në misionet ndërkombëtare dhe në përpjekjet për ruajtjen e paqes, sigurisë dhe stabilitetit.