Pas aktgjykimit lirues për vrasjen e trefishtë në Gllogjan, Kryeprokurori kërkon raport nga Prokuroria e Pejës

Prishtinë, 28 gusht 2026 10:44

Kryeprokurori i Shtetit ka kërkuar raport me shkrim nga Kryeprokurorja e Prokurorisë Themelore në Pejë lidhur me veprimet e ndërmarra gjatë hetimit dhe ndjekjes së rastit të vrasjes së trefishtë në fshatin Gllogjan.

Kërkesa është bërë në bazë të kompetencave ligjore të Kryeprokurorit të Shtetit, pas aktgjykimit të Gjykatës Themelore në Pejë, e cila më 24 gusht 2026 ka shpallur aktgjykim lirues ndaj personave të akuzuar për këtë rast.

Sipas komunikatës së Prokurorisë së Shtetit, raporti i kërkuar do të përfshijë kronologjinë e veprimeve të ndërmarra nga Prokuroria Themelore në Pejë, gjatë trajtimit të rastit.

Rasti i Gllogjanit kishte tronditur opinionin publik në Kosovë, ndërsa procesi gjyqësor ka qenë nën vëmendje të vazhdueshme për shkak të rëndësisë dhe natyrës së rëndë të ngjarjes.

Pas vendimit lirues të gjykatës, Zyra e Kryeprokurorit të Shtetit ka kërkuar që të shqyrtohet në mënyrë të detajuar mënyra se si është zhvilluar procedura nga organi i akuzës në Pejë.

Përmbajtja e raportit dhe hapat eventualë që mund të ndërmerren nga Kryeprokurori i Shtetit pritet të bëhen të ditura pas përfundimit të këtij procesi të raportimit dhe vlerësimit.