Në Muzeun e Burgut të Prishtinës rikthehet historia e “Ilegales” shqiptare

Prishtinë, 26 gusht 2026 08:47

Historia dhe arkivi i fragmentuar i Lëvizjes Shqiptare të Rezistencës në Kosovë, e njohur gjerësisht si “Ilegalja”, do të jenë në fokus të një aktiviteti të organizuar në Muzeun e Burgut të Prishtinës, “Burgu i Idealit”.

Në kuadër të programit “PRISON x RESISTANCE”, antropologia, historiania dhe shkrimtarja Eli Krasniqi do të trajtojë periudha dhe dëshmi të ndryshme që lidhen me veprimtarinë e kësaj lëvizjeje.

Në aktivitet do të prezantohen materiale historike, përfshirë ditarë, shkrime burgu, botime ilegale, procesverbale gjyqësore, këngë dhe dëshmi të mbledhura në periudha të mëvonshme.

Vëmendje e veçantë do t’i kushtohet mënyrës se si burgosja, fshehja, veprimtaria në ilegalitet dhe rrëfimet e mëvonshme kanë ndikuar në ruajtjen dhe dokumentimin e historisë së rezistencës shqiptare në Kosovë.

Krasniqi prej vitesh merret me hulumtimin e lëvizjeve të rezistencës shqiptare në Kosovë, ndërsa puna e saj lidhet edhe me kujtesën, historitë e margjinalizuara dhe pabarazitë historike.

Aktiviteti organizohet nga Prison Radio, Ambasada e Austrisë në Prishtinë dhe Stralli dhe do të zgjasë rreth 90 minuta.