Qeveria miraton nismën për aderimin e Kosovës në zonën “EU Roam Like Home”

Prishtinë, 24 korrik 2026 16:51

Qeveria në detyrë ka miratuar të premten nismën për lidhjen e marrëveshjes ndërkombëtare me Bashkimin Evropian për aderimin në zonën “EU Roam Like Home”.

Kjo marrëveshje do të jetë parakusht për zbatimin e plotë të legjislacionit të Bashkimit Evropian në fushën e roamingut.

Kryeministri në detyrë, Albin Kurti, tha se kjo nismë hap rrugën drejt heqjes së tarifave shtesë të roamingut për qytetarët dhe bizneset kosovare gjatë përdorimit të shërbimeve mobile në vendet pjesëmarrëse të Bashkimit Evropian.

“Kjo është një etapë e rëndësishme në procesin e integrimit tonë digjital në Bashkimin Evropian, që e hap rrugën drejt heqjes së tarifave shtesë të Roamingut për qytetarët dhe bizneset tona gjatë përdorimit të shërbimeve mobile në vende pjesëmarrëse”, tha Kurti.

Një pikë tjetër e rendit të ditës ishte edhe marrëveshja ndërmjet ndërmarrjes publike “Termokos” dhe Bankës Evropiane për Investime për projektin e zgjerimit të sistemit të ngrohjes qendrore në Prishtinë.

Ministri në detyrë i Financave, Hekuran Murati, tha se për realizimin e këtij projekti është paraparë një grand në vlerë prej 17.2 milionë euro.

Në këtë mbledhje, Qeveria në detyrë mori edhe një sërë vendimesh të tjera.

Ekzekutivi miratoi edhe projektrregulloren për zhvillimin e procedurave të rekrutimit të zjarrfikësve.

Ministri në detyrë i Punëve të Brendshme, Xhelal Sveçla, tha se dokumenti është hartuar në përputhje me planin e akteve nënligjore për vitin 2026.

Një prej pikave të rendit të ditës në mbledhjen e Qeverisë në detyrë ishte edhe shqyrtimi dhe riaprovimi i raportit vjetor financiar për buxhetin e Republikës së Kosovës për vitin fiskal 2025.

Kryeministri në detyrë, Albin Kurti, tha se Ministria e Financave ka sjellë për miratim raportin vjetor financiar për buxhetin e vitit fiskal 2025, pas përditësimeve teknike të bëra gjatë procesit të auditimit nga Zyra Kombëtare e Auditimit.