Pas dy dekadash uzurpimi, “Ibër Lepenci” kthen pronat në zonën e Ujmanit në pronësi të shtetit (Video)

Mitrovicë, 21 korrik 2026 10:25

Ndërmarrja Publike “Ibër Lepenci”, me mbështetje të Policisë së Kosovës, ka ndërmarrë sot një aksion për lirimin e pronave të saj në zonën e Ujmanit, ku për rreth dy dekada hëpësirat publike ishin të uzurpuara e të shfrytëzuara në mënyrë të kundërligjshme.

Ekipi i Veritasinfo është në vendin e ngjarjes, duke njoftuar për zhvillimin e këtij aksioni, teksa janë parë mjetë të rëndë motorike, në funksion të realizimit të veprimeve dhe kthimin e pronave në pronësi të ndërmarrjes.

Zëvendësdrejtori i Policisë së Kosovës për rajonin e veriut, Veton Elshani, ka konfirmuar për Veritasinfo se Policia e Kosovës është duke mbështetur aksionin, derisa ka theksuar se gjithcka po shkon sipas planit.

“Konfirojmë se Policia e Kosovës është duke asistuar në aksionin për lirimin e pronave të uzurpuara. Ky akion ka nisur në orët e hershme të mëngjesit dhe gjithcka po shkon sipas planit”, është shprehur Elshani.

Nga ndërmarrja është bërë e ditur se qëllimi i këtij aksioni është mbrojtja e pasurisë publike dhe kthimi i pronave të saj, të cilat për një periudhë të gjatë kanë qenë të uzurpuara. Sipas tyre, këto hapësira janë pjesë e rëndësishme e infrastrukturës dhe funksionimit të ndërmarrjes, veçanërisht në zonën përreth liqenit të Ujmanit.

Procesi i lirimit të pronave vjen pas përpjekjeve të vazhdueshme për identifikimin e hapësirave të uzurpuara dhe ndërmarrjen e masave për rikthimin e kontrollit institucional mbi to.

Pamjet nga aksioni tregojnë makineritë e rënda duke punuar në terren, ndërsa objektet e ndërtuara në këto prona po largohen për t’i kthyer këto sipërfaqe në funksion të qëllimit për të cilin ato i janë besuar ndërmarrjes publike.

“Ibër Lepenci” është një nga ndërmarrjet më të rëndësishme publike në sektorin e ujërave në Kosovë, e cila menaxhon një pjesë të rëndësishme të sistemeve të furnizimit me ujë dhe ujitjes, përfshirë edhe asetet strategjike në zonën e Ujmanit.