Kos: Serbia e detyruar t’i respektojë të drejtat e shqiptarëve në Luginë

Preshevë, 29 Korrik 2025

Serbia është e obliguar që t’i respektojë të drejtat e pakicave sipas standardeve evropiane, si pjesë e procesit të integrimit evropian. Kështu ka deklaruar Marta Kos, Komisionere e Bashkimit Evropian për Zgjerim, në letrën e dërguar deputetit të vetëm shqiptar në Parlamentin e Serbisë, Shaip Kamberi.

“Në kuadër të Kapitullit 23 ‘Gjyqësori dhe të Drejtat Themelore’ të negociatave për anëtarësim, Serbia është e detyruar të zbatojë kuadrin ligjor për të drejtat e personave që i përkasin pakicave, në përputhje me standardet ndërkombëtare dhe evropiane,” ka thënë Kos.

Komisionerja evropiane thekson se Bashkimi Evropian po ndjek nga afër trajtimin e pakicave dhe pozitën e tyre në Serbi, duke konfirmuar se Kapitulli 23 është i rëndësishëm për rrugëtimin e Serbisë drejt BE-së.

“Dëshiroj t’ju siguroj se Komisioni po ndjek me kujdes trajtimin e personave që i përkasin pakicave kombëtare, përfshirë situatën e komunitetit shqiptar në Serbi, gjithashtu në kuadër të zotimeve të marra nga Serbia gjatë negociatave për anëtarësim në BE,” shkruan ajo.

Lidhur me çështjen specifike të ‘pasivizimit’ të adresave, ajo shprehet se Bashkimi Evropian ka theksuar në raportin e Paketës së Zgjerimit për vitin 2024 për Serbinë nevojën që autoritetet të sqarojnë më mirë për publikun mënyrën e verifikimit të statusit të qëndrimit, “gjë që ka rezultuar në ‘pasivizimin’ e disa adresave dhe pyetjen nëse jugu i Serbisë është veçanërisht i shënjestruar”.

Vetë Kamberi thotë se pas kësaj letre dhe reagimeve nga Këshilli Evropian, shqiptarët e Luginës po marrin gjithnjë e më shumë vëmendje në institucionet e Brukselit.

Kujtojmë se javën e kaluar edhe presidenti i Këshillit të BE-së, Antonio Costa, deklaroi se pakicat do të kenë rol të rëndësishëm në kuadër të angazhimeve të Serbisë në procesin e anëtarësimit në BE. Ai shtoi se Këshilli i BE-së është i njoftuar hollësisht mbi çështjen e pasivizimit të adresave në Luginën e Preshevës.