Suhareka do të bëhet me Qendër Kryesore të Mjekësisë Familjare të re, investim prej 4 milionë euro

Suharekë, 10 qershor 2026 15:37

Qyteti i Suharekës pritet të pajiset me një Qendër të re Kryesore të Mjekësisë Familjare pas nënshkrimit të memorandumit të bashkëpunimit ndërmjet Ministrisë së Shëndetësisë dhe Komunës së Suharekës.

Lajmin e ka bërë të ditur ministri i Shëndetësisë, Arben Vitia, i cili njoftoi se marrëveshja është nënshkruar me kryetarin e Komunës së Suharekës, Bali Muharremaj.

Sipas tij, projekti vjen si pjesë e zotimeve për fuqizimin e kujdesit parësor shëndetësor në vend.

Ministri bëri të ditur se investimi për ndërtimin e objektit të ri arrin vlerën e 4 milionë eurove. Ai theksoi se QKMF-ja e re do të ofrojë kushte më të mira për trajtimin e pacientëve, si dhe ambiente më funksionale për stafin shëndetësor.
“Ky investim do t’i sjellë Suharekës një QKMF moderne, me kushte më të mira për pacientët dhe për profesionistët shëndetësorë”, ka deklaruar Vitia.

Ndërtimi i QKMF-së së është një nga investimet më të rëndësishme në sektorin e shëndetësisë në këtë komunë, ndërsa Ministria e Shëndetësisë ka paralajmëruar vazhdimin e investimeve në infrastrukturën e kujdesit parësor në të gjithë vendin.