Vendoset tabelë e re në tri gjuhë në hyrje të Mitrovicës së Veriut

Vendoset tabelë e re në tri gjuhë në hyrje të Mitrovicës së Veriut

Mitrovicë e Veriut, 25 korrik 2025

Në hyrje të pjesës veriore të Mitrovicës, nga drejtimi i Zveçanit, është vendosur një tabelë e re mirëseardhjeje me mbishkrime në tri gjuhë: shqip, serbisht dhe anglisht.

Në njërën anë të tabelës janë shkruar përshëndetjet mirëseardhëse – “Mirësevini”, “Dobrodošli” dhe “Welcome”, ndërsa në anën tjetër, që është e drejtuar nga dalja e qytetit, shkruhet “Mirupafshim”, “Zbogom” dhe “Good bye”.

Kjo tabelë e re ka zëvendësuar atë të mëparshmen që ishte larguar më 10 prill 2025. Më herët, në këtë vend kishte tabela me mbishkrime në gjuhën serbe me alfabetin cirilik.

Vendosja e tabelave të reja është pjesë e një procesi më të gjerë të standardizimit të sinjalistikës rrugore në pjesën veriore të Kosovës, të udhëhequr nga institucionet e Kosovës, përfshirë edhe Ministrinë e Infrastrukturës. Ndryshime të ngjashme janë bërë edhe në tetor të vitit të kaluar në komunën e Zveçanit, ku tabelat e vjetra në cirilikë janë zëvendësuar me të reja në alfabetin latin, me emrat e vendeve të shkruar fillimisht në shqip, e më pas në serbisht.