KQZ: Deri në orën 9:00 votuan 11.24% e votuesve në diasporë

Prishtinë 6 Qershor 2026 11:11

Komisioni Qendror i Zgjedhjeve ka mbajtur konferencën e parë lidhur me ecurinë e procesit të votimit në përfaqësitë diplomatike të Republikës së Kosovës për zgjedhjet e parakohshme parlamentare.

Zëdhënësi i KQZ-së, Valmir Elezi, njoftoi se votimi ka nisur në orën 06:00 sipas kohës lokale në Kosovë në ambasadën dhe konsullatën e Kosovës në Ankara dhe Stamboll, ndërsa nga ora 07:00 procesi është zgjeruar edhe në 24 misione të tjera diplomatike në vendet evropiane.

Ai bëri të ditur gjithashtu se votimi në përfaqësitë diplomatike të Kosovës në Shtetet e Bashkuara të Amerikës dhe Kanada do të fillojë në orën 07:00 sipas kohës lokale të këtyre vendeve, që korrespondon me orën 13:00 sipas kohës së Kosovës.

Sipas të dhënave të prezantuara nga KQZ-ja, deri në orën 09:00, në 25 përfaqësi diplomatike ku procesi i votimit kishte nisur dhe po zhvillohej, pjesëmarrja në votime ka arritur në 11.24 për qind të votuesve të regjistruar.

Nga gjithsej 27,724 qytetarë të regjistruar për votim fizik jashtë vendit, deri në atë kohë kishin votuar 3,117 persona./