Kurti: Kosova ka nevojë për zëra që mbrojnë të vërtetën

Prishtinë 11 Prill 2026 14:28

Kryeministri i Kosovës, Albin Kurti, ka përmbyllur vizitën e tij në Londër me një takim të gjatë me historianin britanik Noel Malcolm.

Ai bëri të ditur se gjatë këtij takimi disaorësh janë diskutuar tema të ndryshme, që nga zhvillimet globale deri te çështjet historike dhe kulturore që lidhen me Kosovën dhe rajonin.

Kurti theksoi rëndësinë e figurave si Malcolm, duke e cilësuar atë si një zë të rëndësishëm që ka kontribuar në paraqitjen e së vërtetës për Kosovën në arenën ndërkombëtare.

“Në një kohë kur bota po sfidohet vazhdimisht nga lajme të rreme për të tashmen dhe revizionizmi historik për të kaluarën, Kosova ka gjithnjë e më shumë nevojë për njerëz si Sir Noel, të cilët kanë edhe dijen, edhe guximin për të folur të vërtetën. Pikërisht këtë e ka bërë ai në veprën e tij klasike “Kosova: një histori e shkurtër”. I botuar në vitin 1998, në fillim të luftës sonë çlirimtare, ky libër i ekspozoi dhe shpartalloi mitet që shërbenin si baza propagandistike për fushatën gjenocidale të Serbisë që kryhej ndaj popullit tonë”, ka theksuar Kurti.