Sindikata i drejtohet Avokatit të Popullit për ndalimin e pesë policëve: Kërkohet mbikëqyrje dhe proces i drejtë

Prishtinë, 16 korrik 2025

Sindikata e Policisë së Kosovës (SPK) i është drejtuar zyrtarisht Avokatit të Popullit, Naim Qelaj, me kërkesë për të monitoruar respektimin e të drejtave të pesë zyrtarëve policorë të ndaluar lidhur me rastin tragjik në Lipjan, ku një i ri humbi jetën.

SPK thekson se masa e ndalimit është e panevojshme dhe kërkon vlerësim të proporcionalitetit të saj, shmangie të stigmatizimit dhe garantimin e një procesi ligjor të drejtë dhe të paanshëm.

Kryetari i Sindikatës ka vizituar familjet e zyrtarëve të ndaluar dhe ka ofruar përkrahje institucionale dhe juridike. SPK u bën thirrje ish-zyrtarëve policorë të jenë të kujdesshëm në deklaratat publike, duke respektuar ligjin dhe ruajtur imazhin e Policisë së Kosovës.

“Sindikata nuk ndërhyn në hetime, por kërkon trajtim të drejtë, human dhe ligjor për çdo zyrtar”, thuhet në njoftim.