Nënshkruhet marrëveshje për mbrojtjen e të dhënave personale dhe privatësisë në raportimin medial

Prishtinë, 16 korrik 2025

Agjencia për Informim dhe Privatësi (AIP), Zyra e Kryeprokurorit të Shtetit, Policia e Kosovës, Inspektorati Policor i Kosovës dhe Asociacioni i Gazetarëve të Kosovës kanë nënshkruar sot një marrëveshje bashkëpunimi për mbrojtjen e të dhënave personale dhe respektimin e të drejtës për privatësi, veçanërisht në komunikimin publik dhe raportimin nga mediat.

Udhëheqësit e këtyre institucioneve – Krenare Sogojeva-Dermaku, Besim Kelmendi, Gazmend Hoxha, Kushtrim Hodaj dhe Xhemajl Rexha – u zotuan për zbatimin e Ligjit Nr. 06/L-082 për Mbrojtjen e të Dhënave Personale dhe theksuan rëndësinë e ruajtjes së balancës ndërmjet lirisë së shprehjes dhe mbrojtjes së privatësisë së qytetarëve.

Marrëveshja parasheh masa konkrete për të parandaluar publikimin e të dhënave personale pa autorizim, për të forcuar rregulloret e brendshme të institucioneve dhe për të ngritur kapacitetet profesionale të zyrtarëve dhe gazetarëve.

Për zbatimin e marrëveshjes, do të formohet një Grup Koordinues ndërinstitucional, i cili do të monitorojë zbatimin dhe do të ndërmarrë veprime për mbrojtjen e të dhënave personale të qytetarëve të Republikës së Kosovës, në përputhje me standardet demokratike dhe të drejtat themelore.