Paralajmërim nga Gjermania: Hepatit A në fruta të ngrira me origjinë nga Serbia

15 Korrik 2025

Autoritetet gjermane kanë lëshuar më 10 korrik një paralajmërim zyrtar pas zbulimit të virusit të hepatitit A në fruta të ngrira mali, të importuara nga Serbia dhe të destinuara për tregun gjerman.

Sipas njoftimit të publikuar në faqen zyrtare të Sistemit Evropian të Alarmit të Shpejtë për Ushqimin (RASFF), bëhet fjalë për një përzierje manaferrash të ngrira, konsumimi i të cilave paraqet rrezik serioz për shëndetin e njeriut.

Ky nuk është rasti i vetëm i alarmit për produktet ushqimore me origjinë nga Serbia. Në fillim të korrikut, autoritetet italiane zbuluan praninë e bakterit listeria në salmonin e tymosur serb, ndërsa më herët, në qershor, Belgjika paralajmëroi për praninë e substancës formetanat në luleshtrydhe të ngrira nga i njëjti shtet.

Hepatiti A është një sëmundje infektive që prek mëlçinë, e shkaktuar nga virusi HAV. Ai përhapet zakonisht përmes konsumimit të ushqimit ose ujit të kontaminuar me jashtëqitje të një personi të infektuar. Sipas Organizatës Botërore të Shëndetësisë, sëmundja është e lidhur ngushtë me kushtet e dobëta sanitare dhe mungesën e higjienës personale.

Ndryshe nga hepatiti B dhe C, hepatiti A nuk shkakton sëmundje kronike të mëlçisë, por në raste të rralla mund të çojë në insuficiencë akute hepatike, e cila mund të jetë fatale.