Në Prishtinë prezantohet procesi i integrimit të Kosovës në NATO

Prishtinë 12 Mars 2026 8:38

Anëtarësimi në NATO mbetet jetik si garanci për paqen, sigurinë e Kosovës dhe stabilitetin në rajon. Ish-atasheu ushtarak i Forcës së Sigurisë së Kosovës në SHBA, Xhavit Gashi, thekson se mbështetja e vazhdueshme amerikane dhe e shteteve tjera anëtare të NATO-s, si dhe transformimi i FSK-së dhe trajnimet sipas standardeve të aleancës, janë hapa të rëndësishëm drejt forcimit të kapaciteteve mbrojtëse të Kosovës dhe afrimit me NATO-n.

Megjithatë, ai nënvizoi se sfidë për vendin në këtë proces mbetet mungesa e institucioneve.

“Në aspektin operacional, taktik që është punë e ushtrisë, e FSK-së, ne jemi pjesë e NATO-s, sepse kemi standardet, trajnimin, edukimin, e kemi besimin. Ndërsa, sa i përket pjesës tjetër politike, unë besoj që këtu sa më shpejt, sa më parë që të krijohen institucionet, sa më pak vakum institucional në cilindo nivel, besoj që e afron më shumë Kosovën afër”, tha Xhavit Gashi, ish-atashe ushtarak i FSK-së në SHBA

Ndërkaq, në një diskutim koloneli në pension nga Korpusi i Marinsave të Shteteve të Bashkuara, Philippe Rogers ofroi një perspektivë unike mbi mënyrën se si funksionon NATO në nivelet strategjike dhe politike. Rogers është njohës i çështjeve të sigurisë euro-atlantike, i cili ka marrë pjesë në shumë operacione ushtarake ndërkombëtare, përfshirë edhe misione në Kosovë.

“Detyrat kryesore janë mbrojtja kolektive dhe shkëmbimi i përgjegjësive. Neni 5 i Traktatit të Atlantikut të Veriut përcakton se një sulm ndaj një aleati konsiderohet sulm ndaj të gjithë aleatëve. Kur ndodh lufta, ndonjëherë nuk je plotësisht i sigurt për të gjitha rrethanat; e di cili është objektivi, por jo gjithmonë është e qartë se kush është në anën pritëse”.

Ndryshe, procesi i anëtarësimit në NATO është i gjatë dhe kompleks, pasi kërkon përmbushjen e kritereve politike, ushtarake dhe institucionale nga vendet synuese. Po ashtu, anëtarësimi kërkon miratimin dhe mbështetjen e të gjitha shteteve anëtare të aleancës përpara se një vend i ri t’i bashkohet kësaj organizate të sigurisë.