Teknologji e re për sigurinë kufitare: Dronë dhe automjete për Policinë e Kosovës

Prishtinë, 12 mars 2026 07:25

Policia e Kosovës ka përfituar një donacion të rëndësishëm nga Ambasada Britanike, i cili synon forcimin e kapaciteteve operacionale dhe ngritjen profesionale të njësive policore, veçanërisht në parandalimin e krimit ndërkufitar dhe migrimit të paligjshëm.

Në kuadër të bashkëpunimit ndërinstitucional, Ambasadës Britanike në Kosovë i ka dhuruar Policisë së Kosovës dy automjete dhe 16 dronë me pajisje përcjellëse, me vlerë totale rreth 153 mijë euro.

Sipas njoftimit të Policisë, pajisjet e reja do të ndihmojnë njësitet policore në identifikimin, gjurmimin dhe monitorimin e automjeteve dhe personave të dyshimtë, si dhe në përcaktimin e vendndodhjes së tyre gjatë operacioneve të ndryshme në terren.

Marrëveshja për pranim-dorëzimin e këtij donacioni u nënshkrua nga drejtori i Departamentit të Policisë Kufitare, Fehmi Xhata, dhe përfaqësuesja e Ambasadës Britanike në Kosovë, Emma Huntley.

Nga Policia e Kosovës është theksuar se pajisjet e specializuara do të kenë rol të rëndësishëm në rritjen e profesionalizmit të institucioneve të sigurisë, veçanërisht të njësive kufitare që janë në vijën e parë të luftës kundër krimit transkufitar, kontrabandës dhe migrimit të paligjshëm.

Përmes përdorimit të teknologjisë së avancuar, si dronët për mbikëqyrje dhe automjetet për operacione në terren, Policia e Kosovës synon të rrisë efikasitetin në patrullim, kontroll kufitar dhe reagim ndaj aktiviteteve kriminale, duke forcuar njëkohësisht sigurinë publike dhe bashkëpunimin me partnerët ndërkombëtarë në fushën e sundimit të ligjit.

Në këtë mënyrë, mbështetja e partnerëve ndërkombëtarë shihet si një hap i rëndësishëm në modernizimin e policisë dhe në përmirësimin e kapaciteteve profesionale për parandalimin dhe luftimin e krimit.