Kurti: Gjenocidi në Srebrenicë, paralajmërim i fushatës gjenocidale që do të ndodhte edhe në Kosovë

Bosnjë-Hercegovinë,  11 Korrik 2025

Thirrje për drejtësi kanë bërë krerët shtetërorë të Kosovës me rastin e shënimit të përvjetorit të 30 të gjenocidit serb, të kryer në Srebrenicë. E reagimi i presidentit të Serbisë, Aleksandër Vuçiq, në këtë përvjetor, ka nxitur reagime, të cilit i është rikujtuar mbrojtja që ua bën autorëve të sulmit terrorist në Banjskë.

Kryeministri në detyrë, Albin Kurti, e zëvendëskryeministret, Donika Gërvalla dhe Emilja Rexhepi, kanë marrë pjesë në shënimin e 30-vjetorit të gjenocidit në Srebrenicë.

Kurti ka shkruar se ajo çfarë ka ndodhur në këtë qytet të Bosnjë-Hercegovinës, ka qenë paralajmërim i fushatës gjenocidale që do të ndodhte edhe në Kosovë.

“Nderimi i Srebrenicës do të thotë t’i nxjerrësh mësimet e saj. Gënjeshtrat e përdorura për të justifikuar krime të tilla ende rishfaqen dhe kur autorët e mohojnë përgjegjësinë, rreziqet e dhunës së ripërtërirë mbeten. “Ecja përpara” e vërtetë do të thotë këmbëngulja për të vërtetën, drejtësinë dhe guximin politik për ta parandaluar përsëritjen e historisë”, ka shkruar Kurti në rrjete sociale.

Thirrje për të mos heshtur ndaj gjenocidit ka bërë presidentja Vjosa Osmani.

“Pas tri dekadash, zëri i Nënave të Srebrenicës mbetet thirrja më e fortë kundër harresës dhe padrejtësisë. Kosova qëndron përkrah tyre, sepse ne e dimë çfarë do të thotë dhimbja e humbja, por dhe angazhimi i palodhur për drejtësi”, ka thënë ajo.

E politikania serbe, Rada Trajkoviq, e ka akuzuar presidentin Aleksandër Vuçiq se përveç autorëve të krimeve në Srebrenicë i mbron edhe ata që kryen sulmin në Banjskë të Zveçanit. Në reagimin e saj ndaj presidentit serb për gjenocidin në Srebrenicë, Trajkoviq ka thënë se keqardhja e shprehur nga ai është duke u bërë për ta shpëtuar postin në krye të shtetit.

“Ndoshta është më mirë ta thoni këtë në serbisht, në mënyrë që autorët e krimeve që po i mbroni nga Srebrenica deri te Banjska të mund ta dëgjojnë mirë? Apo çështja është se me këtë deklaratë e lani veten dhe e shpëtoni kolltukun derisa populli e mban fajin kolektiv”, ka deklaruar Trajkoviq.

Vitin e shkuar, Qeveria e Kosovës e ka shpallur 11 korrikun ditë përkujtimore për gjenocidin e Srebrenicës. 30-vjetori i gjenocidit të kryer në këtë qytet të Bosnjë-Hercegovinës do të shënohet edhe në Kosovë nga ora 20:30, përmes një ngjarjeje përkujtimore në Prishtinë.