Sami Lushtaku merr mbështetjen e Degës së PDK-së në Skenderaj për të garuar për kryetar të Komunës

Skenderaj, 11 Korrik 2025

Sami Lushtaku ka njoftuar sot, më 10.07.2025, se ka marrë mbëshetje unanime nga Kryesia e Degës së PDK-së në Skenderaj për të garuar për kryetar të Komunës në zgjedhjet komunale që mbahen më 12.10.2025.

Sipas njoftimit që Sami Lushtaku (aktualisht nënkryetar i Skenderajt) ka publikuar në profilin e tij në Facebook, vendimi i tij për t’i hyrë sërish garës për kreun e Komunës erdhi si përgjigje ndaj besimit të vazhdueshëm të qytetarëve ndaj tij në çdo palë zgjedhje, prej kur i është futur politikës.

Lushtaku ka kujtuar edhe pengesat, siç ka thënë ai, që i janë bërë me moslejimin e kandidimit në zgjedhjet lokale të vitit 2021 dhe burgosjen e tij disa vite më parë.

“Kandidatura ime vjen edhe si rezultat i padrejtësive ndaj meje në të kaluarën, përfshirë mbajtjen e 4 vite e gjysmë burgim gjatë viteve 2013-2017, proces nga i cili në fund jam shpallur i pafajshëm, si dhe më pas, moslejimi i kandidaturës sime në zgjedhjet lokale të vitit 2021 nga KQZ, për shkak të presioneve politike nga eksponentë të pushtetit aktual i cili tashmë është në shkuarje”- ka shkruar ai në Facebook.

Ai ka shkruar se kandidimi i tij është thirrje për bashkim, për zhvillim, për drejtësi dhe për dinjitetin e Skenderajt.

“Skenderaj do të bëhet çdo vit më i zhvilluar, me punë, me projekte dhe me udhëheqje të drejtë për të gjithë kurse programin e plotë do ta paraqes gjatë javëve të ardhshme”- ka shkruar ai.