Kupa e Kosovës rikthehet sot me dy përballje të forta të 1/8-tës

Prishtinë 10 shkurt 2026 11:22

Sot (e martë) vazhdon gara e Kupës së Kosovës me dy ndeshje të fazës së 1/8-tës së finales, ndërsa përballjet e tjera të kësaj faze janë planifikuar të zhvillohen në ditët në vijim. Me nisjen e edicionit pranveror, vëmendja e skuadrave është rikthyer edhe te Kupa, si një rrugë e rëndësishme drejt trofeut dhe kualifikimit evropian.

Sa i përket ndeshjes kryesore të ditës, në stadiumin me bari artificial në Gjilan zhvillohet derbi mes Dritës dhe Llapit, një përballje që pritet të sjellë rivalitet dhe intensitet të lartë mes dy skuadrave të Superligës.

Në ndeshjen tjetër të programit, Drenica e pret Ferizajn, me takimin që do të zhvillohet në stadiumin “Liman Gegaj” në Malishevë. Të dyja ndeshjet janë të planifikuara të fillojnë nga ora 13:00 dhe në këtë fazë luhet vetëm një takim, ku fituesi siguron kualifikimin në çerekfinale të Kupës së Kosovës.