KFOR dhe Medica Kosova në mbështetje të grave të traumatizuara

Prishtinë 04 shkurt 2026 17:34

Komandanti i Forcës së Kosovës (KFOR), Gjeneral Major Ozkan Ulutas, zhvilloi takimin e tij të parë zyrtar me Veprore Shehu, Drejtoreshë Ekzekutive e Medica Kosova, një organizatë joqeveritare që punon për përmirësimin e gjendjes mendore dhe fizike të grave dhe vajzave të prekura nga trauma të lidhura me luftën, dhunë seksuale dhe pas-luftës.

Takimi shënon një hap të rëndësishëm në integrimin e perspektivës gjinore në operacionet e KFOR-it, duke rritur ndërgjegjësimin dhe njohur ndikimin ndërbreznor të Dhunës Seksuale të Lidhur me Konfliktin. Diskutimet u fokusuan në qasje etike, gjithëpërfshirëse dhe të ndjeshme ndaj traumës për të parandaluar ri-traumatizimin dhe viktimizimin e grave të mbijetuar, thuhet në njoftimine zyrës për iformim të KFOR-it.

Gjeneral Major Ulutas riafirmoi se, sipas mandatit të KFOR-it për të siguruar një ambient të sigurt për të gjithë qytetarët e Kosovës, bashkëpunimi i vazhdueshëm me shoqërinë civile dhe aktorët ndërkombëtarë është thelbësor. Ai vlerësoi punën e Medica Kosova në ofrimin e këshillimit psikologjik, shërbimeve mjekësore dhe ligjore, si dhe programeve për të ardhura për gratë dhe vajzat e traumatizuara, pa dallim etnie apo feje.

“KFOR vazhdon të sigurojë një mjedis të sigurt, duke njohur nevojën për adresimin e efekteve afatgjata të traumës së luftës,” tha Komandanti i KFOR-it. Takimi nënvizoi rëndësinë e dëgjimit të zërave të mbijetuarve të Dhunës Seksuale të Lidhur me Konfliktin për të krijuar paqe pozitive dhe të qëndrueshme.