Ky është zjarrfikësi që humbi jetën në krye të detyrës si pasojë e aksidentit në Gjakovë

Prishtinë, 8 Korrik 2025

Ka vdekur në Qendrën Klinike Universitare të Kosovës, zjarrfikësi dhe shefi i Operativës në Brigadën e Zjarrfikësve të Gjakovës, i cili u aksidentua sot rreth orës 15:30 në fshatin Mejë, ndërsa ishte në krye të detyrës.

Lajmin për vdekjen e tij e kanë konfirmuar Brigada e Zjarrfikësve në Gjakovë.

Ai ishte duke u trajtuar në QKUK, megjithatë humbi betejën pas lëndimeve të marra nga aksidenti.

Kryetari i Sindikatës së Zjarrfikësve, Muharrem Beka, ka thënë se i ndjeri vdiq në krye të detyrës.

“Me pikëllim të thellë morëm lajmin për ndarjen nga jeta të Komandantit të Togut, Kaqun Lima, i cili ndërroi jetë në krye të detyrës duke shërbyer me guxim e përkushtim për mbrojtjen e jetëve dhe pasurisë së qytetarëve. Në emër te Sindikatës se Zjarrfikësve të Kosovës, në këto momente të vështira shprehim ngushëllimet më të sinqerta familjes Lima, shokëve, miqve, kolegëve të Shërbimit te Zjarrfikës dhe Shpëtimit në Gjakovë dhe gjithë Zjarrfikësve në Kosovë.  Kujtimi i tij do të mbetet gjithmonë i gjallë, si shembull i sakrificës dhe humanizmit. Me nderim të thellë për jetën e humbur në detyrë duke ndihmuar qytetarët e vendit tonë”, ka shkruar ai.

Edhe Komuna e Gjakovës ka shprehur ngushëllime për vdekjen e tij.

“Me hidhërim të thellë, morëm lajmin për humbjen e shefit të operativës në brigadën e zjarrfikësve të Gjakovës, Kaqun Lima, i cili dha jetën gjatë një aksidenti automobilistik në orarin e punës, duke u përkushtuar deri në fund detyrës së tij për të shpëtuar të tjerët. Kaquni ishte një shembull i vërtetë i trimërisë, përkushtimit dhe sakrificës. Me kurajën dhe dedikimin e tij, ai ishte pjesë e historisë së kësaj brigade teksa la pas një trashëgimi të ndershme në shërbim të komunitetit. Veprat e tij heroike dhe zemërgjerësia do të kujtohen për gjithmonë nga të gjithë ata që e njohën dhe e respektuan. Në këto çaste të vështira, mendimet dhe lutjet tona janë afër familjes së tij, me lutjen që të gjejnë forcë për ta përballuar këtë humbje të madh”, kanë shkruar në një postim në Facebook.