Rreth 30 mijë euro për ndeshje: RTK do të shpenzojë 120 mijë euro për transmetimin e FC Drita në TV

Prishtinë, 30 janar 2026 15:28

Radio Televizioni i Kosovës (RTK) pritet të shpenzojë rreth 120 mijë euro për transmetimin televiziv të katër ndeshjeve që klubi kosovar FC Drita nga Gjilani do t’i zhvillojë në kuadër të garave të UEFA-s, shkruan Demokracia.com.

Sipas dokumentacionit zyrtar të tenderit, kontrata për “Shërbime teknike për realizimin e ndeshjeve futbollistike të FC Drita sipas standardeve të UEFA-së” është paraparë të nënshkruhet më 6 shkurt 2026, ndërsa vlera totale e saj arrin në 119,960 euro. Procedura është zhvilluar me vetëm një ofertues të pranuar, çmimi i të cilit përkon saktësisht me vlerën përfundimtare të kontratës.

Kontrata pritet t’i jepet kompanisë NGS Productions shpk, me seli në Tiranë, Shqipëri, ndërsa shërbimi përfshin transmetimin e katër ndeshjeve që FC Drita do t’i luajë në kuadër të garave evropiane të UEFA-s.

Sipas specifikacioneve teknike, kostoja mesatare për një ndeshje arrin në rreth 30 mijë euro.

Megjithëse transmetimi i ndeshjeve të klubeve kosovare në arenën evropiane konsiderohet me interes publik, mund të ketë debat nëse kostoja prej 120 mijë eurosh për katër ndeshje është proporcionale dhe e justifikueshme në raport me kapacitetet ekzistuese teknike të RTK-së dhe prioritetet e saj programore.