Qytetarët e Mitrovicës pa shërbime administrative për shkak të një defekti në sistemin qendror

Mitrovicë, 8 Korrik 2025

📌 Komuna e Mitrovicës njofton qytetarët për pezullimin e përkohshëm të shërbimeve civile për shkak të ndërprerjes në sistemin qendror të ARC-së

Komuna e Mitrovicës njofton qytetarët për pezullimin e përkohshëm të të gjitha shërbimeve administrative që lidhen me Agjencinë për Regjistrim Civil (ARC), për shkak të një ndërprerjeje teknike në sistemin qendror.

Kjo situatë ka prekur të gjitha komunat në territorin e Republikës së Kosovës dhe ka pamundësuar përkohësisht ofrimin e shërbimeve të rëndësishme për qytetarët tanë.

Ndërprerja vjen në një kohë të ndjeshme, kur janë në zhvillim:

• regjistrimet e nxënësve në shkollat e mesme,

• aplikimet për subvencione që kanë afate të përcaktuara,

• si dhe kërkesat e shumta të bashkatdhetarëve që ndodhen në vend për çështje dokumentacioni.

Komuna e Mitrovicës thekson se kjo çështje është jashtë kompetencave komunale dhe i takon nivelit qendror. Megjithatë, ne jemi në kontakt të vazhdueshëm me institucionet përgjegjëse dhe po përcjellim nga afër zhvillimet.

“E kuptojmë shqetësimin dhe nevojën urgjente për këto shërbime. Ju sigurojmë se sapo sistemi të rikthehet në funksion, qytetarët do të njoftohen menjëherë,” thuhet në njoftimin zyrtar.