“Vogue” me artikull për dhunën ndaj grave, përfshinë edhe Vasfije Krasniqin Goodman

SHBA, 08 Korrik 2025

Revista e njohur “Vogue” ka shkruar një artikull për dhunën ndaj grave, si pjesë e projektit “Le të flasim për dhunimin”, në të cilin ka përfshirë edhe të mbijetuarën e dhunës seksuale gjatë luftës në Kosovë, Vasfije Krasniqi Goodman.

“Ka plagë aq të thella saqë dështon t’i përshkruash. Dhunimi është një prej tyre. Ai hesht me forcë dhe më pas me turp—duke i lënë të mbijetuarit të izoluar jo vetëm në dhimbjen e tyre, por edhe në paaftësinë e perceptuar për të folur për të”, nis artikulli i “Vogue”.

Pjesë e këtij projekti “Le të flasim për dhunimin”: Fotografia si dëshmi, rezistencë dhe rikuperim, në mesin e shumë grave është edhe Vasfije Krasniqi Goodman.

I përbërë nga mbi 250 autoportrete dhe deklarata personale të të mbijetuarve të dhunës seksuale nga e gjithë bota, ky projekt për të cilin shkruan revista amerikane, i kundërvihet logjikës së anonimitetit apo abstraksionit.

Sipas “Vogue” ky projekt është bashkëpunues dhe i ndjeshëm ndaj traumës, ku të mbijetuarit rimarrin në duar tregimin e tyre përmes autoportreteve, duke e shndërruar krijimin e imazheve në një akt të fuqishëm shërimi dhe fuqizimi.