Prishtinë, 9 janar 2026 18:12
Në një ndërhyrje të shpejtë dhe profesionale, pjesëtarët e Forcës së Sigurisë së Kosovës (FSK) kanë dëshmuar edhe njëherë përkushtimin e tyre ndaj jetës dhe sigurisë së komunitetit.
Sot rreth orës 13:50, një aksident i rëndë trafiku mes një treni dhe një automjeti ka ndodhur në fshatin Grabovc i Poshtëm të Fushë Kosovës, ku tre persona kanë pësuar lëndime. Situata kishte potencial të rëndë, por reagimi i shpejtë dhe profesional i FSK-së solli një kthesë shprese.
Dëshmitarët nga vendi i ngjarjes kanë ndarë pamje ku shfaqen ushtarët e FSK-së duke nxjerrë me kujdes një fëmijë të moshës rreth 7-8 vjeç nga automjeti i dëmtuar, duke siguruar që ai të marrë ndihmën e nevojshme mjekësore pa vonesë.
Ndërkohë që njësitë e tjera të emergjencës, përfshirë Policinë Rajonale dhe ekipet e ndihmës së shpejtë, vazhduan menaxhimin e situatës dhe ndihmuan të lënduarit e tjerë, roli i FSK-së në këtë rast ishte vendimtar për shpëtimin e një jete të pafajshme.
