Neglizhenca e Komunës që udhëhiqet nga Lista Serbe rrezikon qytetarët: Pusetat e hapura shndërrojnë Mitrovicën e Veriut në zonë të rrezikshme

Mitrovicë e Veriut, 8 janar 2026 11:24

Në Mitrovicën e Veriut, ditët e fundit është hapur një numër i madh pusetash në rrugët dhe sheshet e qytetit, nën arsyetimin se kjo po bëhet për të lehtësuar rrjedhjen e ujit pas reshjeve të shumta. Megjithatë, mënyra e papërgjegjshme dhe kaotike e realizimit të këtij veprimi ka nxjerrë në pah neglizhencën serioze të institucioneve lokale që udhëhiqen nga Lista Serbe, duke rrezikuar drejtpërdrejt sigurinë e qytetarëve.

Në shumë lokacione, përfshirë edhe qendrën e qytetit, pusetat e hapura janë lënë pa asnjë shenjë paralajmëruese apo sinjalizim të rregullt. Në vend të standardeve minimale të sigurisë, autoritetet komunale janë mjaftuar me “zgjidhje” të improvizuara, si vendosja e karrigeve apo objekteve të tjera rreth pusetave të hapura. Ky veprim dëshmon qartë mungesën e seriozitetit, profesionalizmit dhe përgjegjësisë nga ana e institucioneve që drejtojnë komunën.

Fotografitë nga terreni tregojnë pusetat e hapura në zona shumë të frekuentuara nga këmbësorët, ku çdo ditë qarkullojnë qytetarë, fëmijë dhe persona të moshuar. Pavarësisht këtij rreziku evident, institucionet lokale nuk kanë ndërmarrë asnjë masë konkrete për të garantuar sigurinë publike.

Situata bëhet edhe më alarmante me faktin se tashmë janë regjistruar të paktën dy incidente, ku automjete kanë rënë në pusetat e hapura. Edhe pse fatmirësisht nuk ka pasur lëndime të rënda, dëmet materiale janë të konsiderueshme dhe rreziku për pasoja tragjike mbetet real. Këto raste janë dëshmi e drejtpërdrejtë e dështimit të menaxhimit komunal dhe e mungesës së kontrollit institucional.

Qytetarët me të drejtë kërkojnë llogari dhe shtrojnë pyetjen se kush do të mbajë përgjegjësi për këtë gjendje të rrezikshme. “Askush nuk e konteston nevojën që uji të largohet, por kjo nuk mund të bëhet duke rrezikuar jetët e njerëzve. Kjo është qendra e qytetit, jo një hapësirë e lënë në mëshirë të fatit”, ka deklaruar për portalin “Veritasinfo” Milosh Simoviq, një nga qytetarët e shqetësuar.

Mungesa e çdo njoftimi zyrtar nga komuna dhe heshtja e institucioneve lokale vetëm sa e thellojnë përshtypjen e neglizhencës dhe papërgjegjshmërisë së pushtetit lokal të udhëhequr nga Lista Serbe. Në mungesë të reagimit institucional, qytetarët janë të detyruar të paralajmërojnë vetë njëri-tjetrin për rrezikun që u kanoset në rrugët e qytetit.

Pusetat e hapura në Mitrovicën e Veriut nuk përbëjnë më vetëm një problem komunal, por një kërcënim serioz për sigurinë publike, për të cilin institucionet lokale mbajnë përgjegjësi të drejtpërdrejtë. Kjo situatë kërkon reagim urgjent, transparencë dhe llogaridhënie nga autoritetet komunale, të cilat deri tani kanë treguar mungesë vullneti për të mbrojtur qytetarët që pretendojnë t’i përfaqësojnë.