Dita e gjashtë e bllokadave të Vidovdanit

Dita e gjashtë e bllokadave të Vidovdanit: Kaos në të gjithë Serbinë, arrestime, incidente dhe mbështetje nga Evropa

Bllokadat e rrugëve dhe protestat nëpër Serbi vazhdojnë për të gjashtën ditë radhazi. Dje në Beograd u organizuan edhe “bllokada lëvizëse”, ndërsa në Zemun, Rruga Kryesore u shpall zonë për këmbësorë – banorët praktikisht e “shkëputën” atë pjesë të qytetit. Situata e ngjashme edhe në qytete të tjera si Novi Sad, Zajeçar, Vranjë e Kruševac – me kontejnerë në rrugë, barrikada dhe polici në çdo cep.

Më shumë se 1.100 persona janë identifikuar nga policia, ndërsa 107 janë arrestuar. Në Zrenjanin janë lënduar lehtë dy qytetarë, kur një makinë ka tentuar të kalojë përmes bllokadës. Incidentet janë raportuar edhe në Beograd dhe Vranjë.

Vuçiq deklaroi se bllokadat po i organizojnë ata “që nuk e duan Serbinë” dhe se populli është “në kufi të durimit”. Policia, sipas tij, është e lodhur, por do ta “kryejë punën”.

Në anën tjetër, protestat po marrin mbështetje ndërkombëtare. Deputetja belge e Parlamentit Evropian, Kathleen Van Brempt, shkroi në Twitter: “Një lider i vërtetë nuk e hesht popullin e tij, por i garanton zgjedhje të lira dhe demokratike.”

Grupet qytetare vazhdojnë me bllokada, përfshirë edhe protestat kundër lokacioneve të EXPO-s. Punonjësit shëndetësorë kanë paralajmëruar protestë më 6 korrik në mbështetje të anesteziologut të arrestuar, Vladimir Stefanović, për të cilin thonë se u ndalua brutalisht ndërkohë që po përpiqej t’i jepte ndihmë të lënduarit.