Mitrovicë, 23 dhjetor 2025 07:32
Hapja e linjës së re të autobusëve që do të lidhë Mitrovicën e Jugut me katër komunat në veri ka pritur reagime jashtëzakonisht pozitive nga qytetarët. Për shumë prej tyre, kjo nuk është thjesht një linjë transporti më shumë, por një ndihmë konkrete në jetën e përditshme dhe një hap i rëndësishëm drejt funksionimit më normal të qytetit, i cili për vite me radhë ka qenë i ndarë.
Qytetarët theksojnë se linja e re do të ndihmojë ndjeshëm ata që udhëtojnë çdo ditë për punë, shkollë, shërbime shëndetësore apo detyra administrative.
“Kjo do të thotë shumë për ne. Udhëtimi në pjesën jugore të qytetit deri tani ishte i komplikuar, sidomos për personat e moshuar. Tani autobusi është gjëja më normale në çdo qytet, ndërsa tek ne deri tani ka qenë luks,” thotë Dejan Simoviç, qytetar i Mitrovicës së Veriut.
Studentët dhe punonjësit që lëvizin çdo ditë midis veriu dhe jugut shprehin kënaqësi të veçantë.
“Më në fund nuk kemi pse të mendojmë se si do të kalojmë urën, sa do të na kushtojë taksia dhe nëse do të arrijmë në kohë. Kjo është ndihmë konkrete për qytetarët,” thotë një studente e re.
Prindërit pohojnë edhe rëndësinë e sigurisë së linjës së paralajmëruar.
“Kur e di që fëmija yt ka transport të sigurt, kjo është çështje civilizimi dhe sigurie, jo politike,” shprehet Milovan Kostiç nga Zveçani.
Qytetarët nga Zveçani, Leposaviçi dhe Zubini i Potokut theksojnë se një linjë e tillë ka qenë e nevojshme prej kohësh dhe përbën një shenjë të qartë që problemet zgjidhen me veprime konkrete, jo vetëm me paralajmërime.
“Nëse funksionon ashtu si është paralajmëruar, do të jetë një nga vendimet më të mira së fundmi. Qytetarët duan të jetojnë më lehtë, jo me tensione të vazhdueshme. Këta autobusë janë një gjë e shkëlqyer dhe padyshim do të kenë ndikim pozitiv për të gjithë,” thotë Nenad Veliçkoviç nga Leposaviçi.
Sipas vlerësimeve të qytetarëve, linja e re e autobusëve ka potencialin të lidhë njerëzit, të lehtësojë lëvizjen dhe të rikthejë ndjesinë e normalitetit – një element që sot konsiderohet më i rëndësishmi.
