KEK: Investimet kumulative në modernizimin e TPP Kosova B tejkalojnë 130 milionë euro

Prishtinë, 20 dhjetor 2025 17:50

Korporata Energjetike e Kosovës ka realizuar dhe planifikuar investime që tejkalojnë 130 milionë euro për modernizimin dhe rehabilitimin e Termocentralit Kosova B, me qëllim rritjen e efikasitetit, sigurisë operacionale dhe uljen e ndotjes mjedisore, raporton KosovaPress.

Projektet bazohen në studimin e fizibilitetit “Masat për reduktimin e ndotjes mjedisore dhe zgjatjen e jetëgjatësisë së njësive në TPP Kosova B”, të financuar nga Bashkimi Evropian në vitet 2016–2017. Një nga projektet kryesore përfshin modernizimin e turbinave, me zëvendësimin e plotë të turbinave me presion të lartë dhe të ulët, si dhe riparimin kapital të turbinës me presion të ndërmjetëm.

Sipas KEK-ut, modernizimi i njësisë B2 ka dhënë rezultate konkrete, ku gjatë testimeve të fuqisë, gjeneratori ka arritur kapacitet prej 345 Më, ndërsa aktualisht njësia operon me 310–320 Më, varësisht nga nominimet ditore të energjisë.

Paralelisht, sipas të dhënave të KEK-ut, janë planifikuar edhe investime mjedisore të financuara nga fondet IPA të BE-së, përfshirë filtrat elektrostatikë, transportin e brendshëm të hirit dhe sistemin DeNOx, me zbatim të planifikuar në vitet 2026 dhe 2027.