Specialja vendos: Procesi gjyqësor ndaj ish-krerëve të UÇK-së vazhdon në gusht

Hagë, 02 Korrik 2025

Trupi Gjykues në rastin e madh të Speciales, “Thaçi dhe të tjerët”, në krye me Charles Smith III e ka pranuar kërkesën e ekipeve mbrojtëse të katërshes për ta shtyrë konferencën përgatitore për Mbrojtjen nga 21 korriku në javën e tretë të gushtit 2025.

Rrjedhimisht, Thaçi, Veseli, Krasniqi e Selimi dhe ekipet e tyre mbrojtëse do të bëjnë të ditur përfundimisht numrin e dëshmitarëve dhe listën e provave që synojnë të përdorin gjatë paraqitjes së rastit të tyre, të martën më 19 gusht nga ora 10 e mëngjesit.

Gjykata nuk e ka pranuar edhe pjesën tjetër të kërkesave të Mbrojtjes për të shtyrë edhe afatet e zbulimit të dëshmitarëve dhe provave që pritet të merren nga burime ndërkombëtare, të klasifikuara.
Përkundrazi, përgjigjen pozitive e ka ruajtur për Prokurorinë e cila kishte propozuar që lista me dëshmitarë dhe prova të dorëzohet deri më 21 korrik 2025.

Një ditë më vonë, më 22 korrik pritet të mbahet edhe një konferencë e radhës për ecurinë e çështjes gjatë të cilës mund të bëhet e ditur nëse Gjykata e pranon apo rrëzon, qoftë edhe pjesërisht kërkesën përfundimtare të Mbrojtjes për të rrëzuar pika të caktuara të Aktakuzës.
Ekipet e kanë dorëzuar Mocionin e tyre të përbashkët më 12 qershor.