Policia apelon: Kujdes me zjarrin, rreziku është i madh

2 korrik 2025

Temperaturat e larta dhe përvojat nga vitet e kaluara rikujtojnë sa shpejt zjarri mund të shkaktojë dëme serioze dhe të rrezikojë jetë njerëzish.

Drejtoria Rajonale e Policisë në Pejë u bën thirrje qytetarëve për kujdes të shtuar – sidomos në rastet e ndezjes së zjarreve në ambiente të hapura, përdorimit të grilave, hedhjes së bishtave të cigareve apo çdo veprimi tjetër të pakujdesshëm që mund të çojë në zjarr.

“Çdo pakujdesi, sado e vogël të duket, mund të sjellë pasoja të mëdha. Apelojmë tek qytetarët që të shmangin ndezjen e zjarrit dhe të raportojnë menjëherë çdo aktivitet të dyshimtë që mund të shkaktojë zjarr”, thuhet në njoftimin e policisë.

Policia ka paralajmëruar masa ligjore për të gjithë ata që, qoftë me qëllim apo nga pakujdesia, rrezikojnë jetën dhe pronën e të tjerëve.

Nga Peja, mesazhi është i qartë: të jemi të përgjegjshëm – natyra, njerëzit dhe komuniteti varen edhe nga kujdesi ynë.