Mitrovica e Veriut vazhdon investimet publike në infrastrukturën rrugore

Mitrovicë, e Veriut, 11 nëntor 2025 09:01

Ndërsa në pjesën jugore të Mitrovicës së fundmi është zgjedhur kryetari i ri i komunës, në pjesën veriore të qytetit po zhvillohen punime për rindërtimin dhe asfaltimin e disa rrugëve.

Banorët e Mitrovicës së Veriut shprehen të kënaqur që, siç thonë ata, “të paktën po bëhet diçka konkrete”.

Ekipet gjatë ditëve të fundit kanë punuar intensivisht në sanimin e rrugëve të dëmtuara, ndërsa në disa zona është vendosur shtresë e re asfalti. Veçanërisht është riparuar një pjesë e rrugës në periferi të qytetit, si dhe disa rrugica më të vogla që prej kohësh ishin në gjendje të keqe.

“Nuk na intereson kush është kryetar dhe ku, e rëndësishme është që të shihet ndonjë përmirësim tek ne. Ky asfalt ishte i nevojshëm, sidomos para dimrit,” thotë Dejan Iliq, banor i Mitrovicës së Veriut.

Edhe pse qytetarët i mirëpresin punimet, disa prej tyre theksojnë se nevojiten më shumë investime në infrastrukturë, veçanërisht në rrugët dytësore dhe hyrjet e ndërtesave. “Asfaltimi është gjë e mirë, por ende ka shumë gropa dhe pjesë të parregulluara. Shpresojmë që mos të përfundojë gjithçka vetëm me një shirit të ri asfalti,” shton banorja Marija Gjuriq nga qendra e qytetit.

Ndërsa në jug po formohet pushteti i ri lokal, në veri krijohet përshtypja se po i kushtohet më shumë vëmendje çështjeve praktike — atyre që qytetarët i ndiejnë më shpejt nën këmbët e tyre.