Rritje e sigurisë: Kamera sigurie vendosen në Zveçan

Zveçan, 7 nëntor 2025

Në kuadër të angazhimeve për rritjen e sigurisë publike dhe për kontrollin e situatave emergjente, Policia e Kosovës ka vazhduar vendosjen e infrastrukturës për instalimin e kamerave në Zveçan, konkretisht në rrugën që lidh këtë komunë me Mitrovicën.

Zëvendëskomandanti i Policisë së Kosovës për rajonin e Veriut, Veton Elshani, ka thënë se ky është një plan i gjerë që përfshin të gjitha komunat e pjesës veriore të Republikës së Kosovës.
“Po, kemi vazhduar vendosjen e infrastrukturës për kamerat në Zveçan, por jo vetëm kaq – po rregullohen edhe kabllot e ndriçimit në këtë segment të rrugës,” ka konfirmuar ai për media.

Bëhet fjalë për vazhdim të aksionit që kishte filluar vitin e kaluar në pjesën veriore të Mitrovicës.

“Ashtu siç kemi filluar në Mitrovicë, tani po vazhdojmë në Zveçan, pastaj edhe në Leposaviq e Zubin Potok. Pra, do të ketë kamera kudo, ashtu siç e kemi paralajmëruar vitin e kaluar,” shtoi ai.
Elshani ka theksuar se bëhet fjalë për kamera sigurie dhe jo për kamera trafiku.
“Këto janë vetëm për siguri; nuk matin shpejtësinë. Megjithatë, mund të përdoren edhe për këtë qëllim në raste të veçanta,” ka shpjeguar ai.