Ushtarë nga Hungaria dhe Rumania nderohen me medalje të NATO-s në Kosovë

Novo Selo, 28 Qershor 2025

Në një ceremoni të mbajtur dje në Kampin Novo Selo, komandanti i misionit të udhëhequr nga NATO në Kosovë (KFOR), Gjeneral Major Enrico Barduani, udhëhoqi parakalimin ceremonial të medaljeve për Batalionin Rezervë Taktik Kinetik (KTRBN).

Gjatë kësaj ceremonie, ushtarë nga Hungaria dhe Rumania u dekoruan me Medaljen e NATO-s për Misionet Jo-Neni 5, si shenjë vlerësimi për profesionalizmin, përkushtimin dhe shërbimin e tyre ndaj paqes dhe stabilitetit në Kosovë. Këto cilësi përfaqësojnë thelbin e Batalionit KTRBN, njësia me gatishmëri të lartë e KFOR-it, që luan një rol të rëndësishëm në përmbushjen e mandatit të këtij misioni.

Në fjalën e tij, gjeneral Barduani falënderoi sinqerisht ushtarët për kontributin e tyre të çmuar: “Jam thellësisht mirënjohës për përkushtimin tuaj ndaj mandatit të KFOR-it për të ruajtur një ambient të sigurt dhe të qëndrueshëm për të gjitha komunitetet në Kosovë.”

KFOR-i vazhdon të zbatojë mandatin e tij në përputhje me Rezolutën 1244 të Këshillit të Sigurimit të OKB-së të vitit 1999, duke vepruar gjithmonë në mënyrë të paanshme dhe në bashkëpunim të ngushtë me Policinë e Kosovës dhe misionin e BE-së për sundimin e ligjit në Kosovë (EULEX).