“Return to Kosovo”, dokumentar që risjell plagët e luftës në një mbrëmje të veçantë në Cyrih

Prishtinë, 5 tetor 2025

Në një atmosferë të ngarkuar emocionale, Konsullata e Republikës së Kosovës në Cyrih organizoi shfaqjen e dokumentarit “Return to Kosovo”, i gazetarit britanik Julius Strauss.

“Në përvojën time 15-vjeçare në institucionet e Republikës së Kosovës, kam udhëhequr shumë procese e projekte, por shfaqja e filmit dokumentar Return to Kosovo mbetet një ndër aktivitetet më të veçanta në detyrën time diplomatike”, u shpreh Konsulli i Kosovës në Cyrih, Vigan Berisha, duke hapur mbrëmjen.

Dokumentari sjell rrëfimin e dhimbshëm të familjes Deliu nga Abri e Epërme. Besnik Deliu, që si fëmijë pesëvjeçar mbijetoi masakrën ku humbën jetën 23 anëtarë të familjes së tij, është në qendër të filmit. Strauss, i cili e kishte takuar Besnikun menjëherë pas tragjedisë, rikthehet pas dy dekadash për ta gjetur atë tashmë si burrë, bashkëshort, baba dhe pjesëtar i Ushtrisë së Kosovës. Ky ribashkim përbën boshtin emocional të filmit.

Dokumentari sjell edhe histori të tjera të prekshme nga lufta e Kosovës, mes tyre edhe rrëfimin e një vajze dhjetëvjeçare, e cila çdo ditë ndalonte fshehurazi pranë varrit të nënës së saj të vrarë mizorisht, duke marrë një gur që e mbante nën jastëk si kujtim. Ky detaj i dhimbshëm ilustron plagët e thella që lufta u ka lënë fëmijëve.

Në këtë mbrëmje ishin të pranishëm përfaqësues të shumë shteteve mike – Shqipërisë, Turqisë, Kroacisë, Portugalisë, Italisë, Japonisë, Belgjikës, Republikës Çeke, Estonisë, Sllovakisë, Gambias, Bahamas, Maltës, Monakos dhe Seychelles.

Po ashtu morën pjesë deputetë kantonalë dhe komunalë si Drin Alaj, Daniel Wäfler dhe Dafi Muharemi, si dhe personalitete nga fusha e shëndetësisë, mes tyre Labinot Demaj, Sekretar i Përgjithshëm i Departamentit të Shëndetësisë në Kantonin e Cyrihut.

Konsulli Berisha falënderoi gjithashtu komunitetin shqiptar në Zvicër, shoqatat kulturore e sportive, misionet fetare, ansamblet, bizneset dhe mjekët, për pjesëmarrjen e tyre, duke theksuar unitetin e mërgatës.