Pekini pa diplomaci formale: Si ndikon Kina në Kosovë përmes biznesit dhe kutlurës?

Prishtinë, 26 shtator 2025

Sipas një raporti të hartuar nga Qendra Kosovare për Studime të Sigurisë në Prishtinë, shteti i largët aziatik – Kina, nëpërmjet një strategjie në Kosovë, e cila bazohet në aktivitetin ekonomik dhe në fushata të dezinformimit, ka treguar kohën e fundit prirje për të zhvilluar takime me autoritetet lokale dhe për të ndihmuar në fushat si ekonomia, kultura dhe arti.

Adelina Hasani, autore e raportit që është prezantuar sot në një tryezë të rrumbullakët, ka thënë: “Së fundmi, Pekini ka treguar gjithashtu prirje për të zhvilluar takime me autoritetet lokale dhe për të ndihmuar në fusha si ekonomia, kultura dhe arti. Megjithëse Kina nuk e njeh shtetin dhe nuk mban marrëdhënie diplomatike formale me institucionet e Kosovës, ajo vepron përmes kanaleve indirekte, veçanërisht përmes tregtisë, partneriteteve dhe lidhjeve me bizneset vendore”.

Sipas raportit, ndikimi i Kinës realizohet kryesisht përmes lidhjeve të tërthorta ekonomike dhe kulturore, dhe jo përmes përballjes së hapur.

Për të mbrojtur proceset demokratike, Kosova dhe partnerët e saj duhet të forcojnë mekanizmat e monitorimit, të rrisin ndërgjegjësimin institucional dhe shoqëror, si dhe të zhvillojnë strategji të përbashkëta me vendet e Ballkanit Perëndimor për të kufizuar varësinë ekonomike, u tha në këtë tryezë.