Kurti reagon për vdekjen e Enver Petrovcit: Sot Kosova humbi një thesar kombëtar

Prishtinë 22 Shtator 2025

Kryeministri në detyrë, Albin Kurti ka reaguar për vdekjen e aktorit dhe regjisorit, Enver Petrovci, duke thënë se sot Kosova ka humbur një thesar kombëtar.

Kurti ka theksuar se para veprës së Petrovcit shtrihet një kaleidoskop artistik i pamasë, i cili, sipas tij, me rolet dhe profesionalizmin e përpiktë, e ka ngritiur teatrin dhe filmin kosovar në skenën vendore, rajonale dhe evropiane.

“Me dhimbje e pikëllim mora lajmin për ndarjen nga jeta të aktorit, regjisorit dhe pedagogut tonë Enver Petrovci. Kujtesa energjike dhe qartësia e mendimit e bënin të veçantë: në çdo takim përçonte frymëzim me liri shprehjeje, kurse me vështrime lucide e humor vitruoz ndriçonte çdo bisedë. Para veprës së tij shtrihet një kaleidoskop artistik i pamasë. Ai ishte themelues i Teatrit “Dodona” dhe i Shkollës së Aktrimit, profesor në degën e aktrimit në Universitetin e Prishtinës, i dashur për aq shumë gjenerata studentësh. Me rolet e tij të paharrueshme dhe profesionalizmin e përpiktë, ai e ngriti teatrin dhe filmin tonë në skenën vendore, rajonale dhe evropiane.
Sot Kosova humbi një thesar kombëtar, por trashëgimia e tij artistike do të mbetet e gjallë, pasuri e përbashkët që institucionet tona dhe komuniteti i artistëve do ta ruajnë e përcjellin brez pas brezi. Ngushëllime të përzemërta familjes, kolegëve dhe të gjithë artdashësve”, ka shkruar Kurti në Facebook.