Shtetet evropiane të gatshme të dërgojnë 50 mijë trupa në Ukrainë në rast armëpushimi

18 gusht, 2025

Vendet kryesore evropiane po shqyrtojnë mundësinë e vendosjes së një force tokësore prej 50.000 ushtarësh në Ukrainë, nëse arrihet një marrëveshje për armëpushim, raporton e përditshmja finlandeze Iltalehti, duke cituar burime të politikës së jashtme dhe të sigurisë.

Sipas raportit, është hartuar tashmë një plan operativ që parasheh dislokimin e një force të plotë ushtarake nën komandën e një gjenerali perëndimor, me qëllim të ofrimit të garancive të qarta sigurie për Kievin.

Ky kontingjent do të vendosej në kuadër të “Koalicionit të Vullnetarëve”, të udhëhequr nga Mbretëria e Bashkuar dhe Franca. Prania e 50 mijë trupave perëndimore do të kishte rol dekurajues, duke parandaluar Rusinë që të ndërmarrë hapa të mëtejshëm agresivë.

Forcat tokësore do të mbështeteshin gjithashtu nga njësi ajrore dhe detare të vendeve aleate, me synim sigurimin e mbrojtjes së hapësirës ajrore të Ukrainës.

Ky plan, i cili shihet si një prej garancive më serioze të sigurisë për Kievin, synon të krijojë një “ombrellë të besueshme mbrojtjeje” në rast se palët bien dakord për një ndalim të luftimeve.