Vuçiq kërcënon protestuesit: “Përgjigjja e shtetit do të jetë krejt ndryshe”

17 gusht, 2025

Presidenti i Serbisë, Aleksandar Vuçiq, ka ashpërsuar tonet ndaj protestuesve që prej muajsh po demonstrojnë kundër qeverisë së tij. Në një postim në Facebook, ai paralajmëroi se shteti do të përdorë të gjitha mjetet për të rivendosur rendin dhe ligjin.

“Përgjigjja e shtetit do të jetë ndryshe nga ajo që keni parë deri më tani. U premtoj qytetarëve të Serbisë se ‘djegia e vendit’ nuk do të zgjasë shumë. Do të përdorim gjithçka që kemi në dispozicion për të rikthyer ligjin, paqen dhe rendin. Për sa kohë që marr frymë, do të luftoj për Serbinë dhe qytetarët e saj – dhe ne do të fitojmë”, ka shkruar Vuçiq.

Protestat nisën pas tragjedisë në Novi Sad, kur shembja e një stacioni hekurudhor në nëntor 2024 shkaktoi vdekjen e 16 personave. Me kohën, ato u shndërruan në demonstrata masive kundër korrupsionit, ku morën pjesë qindra mijëra qytetarë.

Deri vonë protestat kishin qenë kryesisht paqësore, por situata u tensionua këtë javë pas përplasjes me kundërdemonstrues proqeveritarë. Të shtunën mbrëma, mijëra protestues dolën sërish në rrugë duke kërkuar zgjedhje të parakohshme, ndërsa policia u vendos në disa qytete, përfshirë edhe Beogradin.

Zyra dhe flamuj të Partisë Progresive Serbe (SNS) u dogjën gjatë protestave, ndërsa protestuesit thyen dritare edhe në selinë e Partisë Radikale Serbe – një partnere e koalicionit qeverisës të SNS-së.