Përmbyllet me sukses panairi “Gratë si promotore të zhvillimit të turizmit” në Mitrovicë

Mitrovicë, 17 gusht 2025

Me një pjesëmarrje të gjerë të grave artizane dhe sipërmarrëse lokale, është përmbyllur me sukses panairi “Gratë si promotore të zhvillimit të turizmit në Mitrovicë”, organizuar nga Drejtoria për Ekonomi, Zhvillim dhe Turizëm e Komunës së Mitrovicës.

Qëllimi i këtij panairi ishte promovimi i produkteve tradicionale, fuqizimi ekonomik i grave dhe mbështetja e zhvillimit të turizmit lokal. Gjatë panairit, vizitorët patën mundësinë të njihen me artizanatet, ushqimet tradicionale dhe produktet e prodhuara nga gratë e qytetit.

Drejtori i kësaj drejtorie, Elvis Feka, në një postim publik, shprehu falënderime të veçanta për të gjitha gratë pjesëmarrëse, duke vlerësuar kontributin dhe përkushtimin e tyre.

“Dje përmbyllëm panairin ‘Gratë si promotore të zhvillimit të turizmit në Mitrovicë’. Faleminderit nga zemra për punën dhe angazhimin e grave të vyera të qytetit tonë!”, ka shkruar Feka.

Ky aktivitet vlerësohet si një hap i rëndësishëm për nxitjen e turizmit dhe fuqizimin e rolit të grave në zhvillimin ekonomik të Mitrovicës.