Sulm mizor nga policia serbe, ia humb shikimin një gazetari

Beograd, 16 Gusht 2025

Policia e sulmoi pabesisht nga pas gazetarin Vuk Cvijiq

Pasojat e spërkatjes me sprej kulmuan me verbim të plotë për të paktën një orë. Më pas, ndihmën mjekësore ma ofruan mjekët në Spitalin e Zemun-it, të cilët konstatuan të gjitha pasojat e sulmit ndaj meje.

Vuk Cvijiq, gazetar i Radarit, është sulmuar mbrëmë nga policia me një substancë kimike gjatë protestës së qytetarëve në Beograd kundër represionit të regjimit, ndërsa po kryente detyrën e tij si gazetar. Sulmi, sipas vetë Cvijiqit, ndodhi papritur, në një moment kur në Rrugën e Knez Miloš-it nuk po ndodhte asgjë.

Redaksia e Radarit e dënon ashpër përdorimin brutal të mjeteve të palejuara ndaj gazetarëve dhe kërkon nga prokuroria të hetojë urgjentisht se kush e rrezikoi Vuk Cvijiqin dhe çfarë substance u përdor në sprejin me të cilin u spërkat nga polici.

Pak para se të niste ndërhyrja e policisë, një polic me pajisje mbrojtëse doli pak përpara kordonit dhe e sulmoi nga pas gazetarin e Radarit, Vuk Cvijiqin. Edhe pse në atë moment ndodheshin aty shumë njerëz, polici iu afrua drejtpërdrejt Cvijiqit dhe e spërkati me një lëng kimik të panjohur.

Siç shpjegon Cvijiqi, ai nuk e pa policin kur iu afrua nga pas, por e panë kolegët gazetarë me të cilët po qëndronte dhe bisedonte. Ndër dëshmitarët e sulmit ishte edhe gazetari i televizionit Nova, Marko Noviqiq. Sipas dëshmisë së Cvijiqit, ai po qëndronte me kolegët dhe miqtë përballë kordonit të policisë në Rrugën e Knez Miloš-it, pranë Shtabit të Përgjithshëm.

“Polici me pajisje mbrojtëse më erdhi nga pas dhe më spërkati në qafë dhe anën e djathtë të fytyrës. Ai e bëri këtë pa asnjë arsye, në një moment kur nuk po ndodhte asgjë.”

“Fillimisht mendova se ishte ndonjë lëng i zakonshëm, ujë ndoshta, por kolegët më thanë se më kishte spërkatur një polic nga pas. Ai e bëri këtë krejt papritur, pa asnjë shkak,” shpjegon Cvijiqi.

Reagimi nuk ishte i menjëhershëm – pas pak kohe ai filloi të ndjente djegie në qafë.

“Pasojat e spërkatjes kulmuan me faktin që isha plotësisht i verbër për të paktën një orë. Më ndihmoi një farmaciste që më dha ujë dhe tretësirë fiziologjike për shpëlarje. Më pas, ndihmën mjekësore ma ofruan mjekët në Spitalin e Zemun-it, që ishte në gatishmëri. Ata konstatuan të gjitha pasojat e sulmit ndaj meje,” përshkroi Cvijiqi dhe shtoi se simptomat i ndjeu deri në orët e para të mëngjesit.

“Fillimisht më digjte qafa, më pas verbova plotësisht, dhe më vonë skuqja dhe djegia u përhapën edhe në duar,” shton ai.

Ky ishte sulmi i dytë i policisë ndaj Cvijiqit që nga fillimi i protestave. Më parë, ai ishte sulmuar para Fakultetit Juridik kur policët tentuan ta ndalonin ta kryente punën e tij. Ndërsa po filmonte arrestimin dhe rrahjen brutale të studentëve, ai u sulmua fizikisht nga policët që tentuan ta pengonin të dokumentonte ngjarjen me telefonin e tij.