Garda Kombëtare shfaqet në rrugët e Uashingtonit

Uashtington, 13 Gusht 2025

Trupat e Gardës Kombëtare Amerikane kanë filluar të shfaqen në rrugët e Uashington DC, një ditë pasi presidenti Donald Trump urdhëroi vendosjen e tyre dhe mori kontrollin mbi forcat policore të qytetit, duke argumentuar se niveli i krimit të dhunshëm është jashtë kontrollit.

Të martën në mbrëmje, automjete të blinduara u panë në qendrat urbane dhe në zonat turistike përreth kryeqytetit të SHBA-së, raporton BBC. Zyrtarët njoftuan se pritet të vendosen rreth 800 trupa të Gardës Kombëtare dhe 500 agjentë federalë të zbatimit të ligjit.

Kryebashkiakja e Uashington DC, Muriel Bowser, nga Partia Demokratike, e mohoi pretendimin se krimi në qytet është jashtë kontrollit dhe e përshkroi vendosjen e trupave si një “shtytje autoritare”. Trump, një republikan, ka kërcënuar me masa të ngjashme edhe në Nju Jork dhe Çikago, dy qytete të tjera të udhëhequra nga demokratët.

Që nga njoftimi i së hënës, trupat e Gardës janë parë duke ngritur barrikada pranë ndërtesave qeveritare dhe madje duke bërë fotografi me turistët. Sipas sekretares së shtypit të Shtëpisë së Bardhë, Karoline Leavitt, të hënën mbrëma agjentët federalë arrestuan 23 persona për vepra si vrasje, krime me armë zjarri, trafik droge, akte të turpshme, ndjekje, drejtim të pakujdesshëm të automjetit dhe shkelje të tjera.

“Ky është vetëm fillimi,” deklaroi Leavitt në një konferencë për media. “Gjatë muajit të ardhshëm, administrata Trump do të ndjekë dhe arrestojë pa pushim çdo kriminel të dhunshëm në Distrikt, që shkel ligjin, minon sigurinë publike dhe rrezikon jetën e amerikanëve që e respektojnë ligjin,” shtoi ajo.