21 të vdekur nga shembja e një ndërtese në Gazë, e dëmtuar nga lufta

Prishtinë, 17 shtator 2026 07:06

Të paktën 21 persona kanë vdekur, përfshirë tetë fëmijë, ndërsa dhjetëra të tjerë rezultojnë të zhdukur, pasi një ndërtesë e dëmtuar nga lufta është shembur gjatë natës në Rripin e Gazës, kanë bërë të ditur ekipet lokale të shpëtimit dhe mjekët.

Dëshmitarët i kanë thënë BBC-së se ndërtesa gjashtëkatëshe në zonën Tal al-Hawa të qytetit të Gazës kishte mbetur e anuar në mënyrë të rrezikshme në njërën anë, pas një sulmi izraelit më shumë se një vit më parë. Ata kanë thënë se brenda saj po jetonin familje të zhvendosura, sepse nuk kishin zgjidhje tjetër.

Agjencitë e OKB-së dhe një ekip egjiptian i janë bashkuar kërkimit për të mbijetuar, por zyrtarët thonë se operacioni po zhvillohet ngadalë për shkak të mungesës së pajisjeve.

Në përpjekjet fillestare të shpëtimit, pjesëtarët e agjencisë së Mbrojtjes Civile, e drejtuar nga Hamasi, u detyruan të përdornin duart e tyre.

“Ende po dëgjojmë zëra nën rrënoja, kështu që ka ende shpresë për të gjetur njerëz”, ka thënë Raed al-Dahshan, drejtori i Mbrojtjes Civile në qytetin e Gazës.