Nënshkruhet granti prej 1.65 milionë eurosh për banimin social në Istog, do të përfitojnë 60 familje

Istog, 8 shtator 2026 15:03

Komuna e Istogut do të përfitojë 1 milion e 650 mijë euro nga Qeveria e Kosovës në kuadër të Projektit të Banimit Social Adekuat.

Marrëveshja e grantit është nënshkruar nga ministrja Fitore Pacolli dhe kryetari i Komunës së Istogut, Ilir Ferati. Sipas marrëveshjes, fondet do të përdoren për përmirësimin e kushteve të banimit për familjet në nevojë.

Me këtë investim parashihet renovimi i 55 shtëpive, ndërsa pesë shtëpi të tjera do të rindërtohen. Në total, nga projekti pritet të përfitojnë drejtpërdrejt 60 familje.

Ministrja Pacolli e ka cilësuar këtë investim si mbështetje konkrete për familjet që kanë më së shumti nevojë, duke theksuar rëndësinë e përmirësimit të kushteve të banimit dhe mirëqenies së tyre.

Investimi prej 1.65 milionë eurosh synon të përmirësojë standardin e jetesës së familjeve përfituese dhe të kontribuojë në sigurimin e një banimi më të përshtatshëm për to.