Mbi 10 kilogramë marihuanë sekuestrohen në Nabërgjan të Pejës, arrestohet një perso

Pejë, 3 shtator 2026 12:40

Rreth 10.5 kilogramë substancë narkotike e llojit marihuanë janë sekuestruar gjatë një operacioni të Policisë së Kosovës në fshatin Nabërgjan të Pejës.

Operacioni është zhvilluar në orët e hershme të mëngjesit nga hetuesit e Njësitit për Luftimin e Narkotikëve në Pejë, në kuadër të veprimeve hetimore dhe operative.

Gjatë aksionit, policia ka arrestuar një person, i dyshuar për veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.

Në vendin e ngjarjes ka dalë edhe një prokuror nga Departamenti i Krimeve të Rënda i Prokurorisë Themelore në Pejë, i cili ka koordinuar dhe mbikëqyrur veprimet e mëtejshme procedurale, njofton Prokuroria e Kosovës.

I dyshuari është dërguar në Stacionin Policor, ku po intervistohet nga hetuesit. Ndërkohë, gjatë operacionit është sekuestruar edhe një telefon mobil, i cili do të përdoret si pjesë e procedurave të mëtejshme hetimore.

Prokuroria Themelore në Pejë ka bërë të ditur se hetimet po vazhdojnë nën udhëzimet dhe koordinimin e prokurorit të shtetit.

Operacioni është zhvilluar në bashkëpunim mes Prokurorisë Themelore në Pejë dhe Njësitit për Luftimin e Narkotikëve, në kuadër të përpjekjeve për parandalimin dhe luftimin e veprave penale që lidhen me narkotikët.