Shtyhet aktgjykimi ndaj Milorad Gjokoviqit

Prishtinë, 27 korrik 2026 14:37

Shpallja e aktgjykimit ndaj Milorad Gjokoviçit është shtyrë, pasi trupi gjykues ka vendosur të rihapë shqyrtimin gjyqësor për administrimin e provave shtesë.

Sipas gjyqtares Donika Shalja-Avdulji, pas analizimit të çështjes është vlerësuar se është e nevojshme të sigurohet deklarata e dëshmitares Nurije Krasniqi, në mënyrë që vendimi përfundimtar të mbështetet në një shqyrtim të plotë të provave.

“Nëse gjykata arrin ta sigurojë deklaratën e saj, atëherë, bazuar në gjetjet e reja, dëshmitarja Nurije Krasniqi mund të merret në pyetje. Në atë rast, seanca kryesore do të mbahet sërish”, tha gjyqtarja.

Avokatët mbrojtës deklaruan se, sipas tyre, ky është rasti i parë ku shpallja e aktgjykimit shtyhet për shkak të nevojës për marrjen në pyetje të një dëshmitari shtesë.

Milorad Gjokoviçi akuzohet nga Prokuroria e Kosovës për krime lufte të kryera në maj të vitit 1999 në fshatin Ozdrim, afër Pejës. Sipas aktakuzës, ai dyshohet se ka marrë pjesë në vrasjen e tetë civilëve shqiptarë dhe në dëbimin e dhjetëra banorëve të tjerë.

Gjokoviçi u arrestua më 27 qershor 2022 dhe në fillim të procesit gjyqësor është deklaruar i pafajshëm ndaj akuzave.

Gjatë procesit janë përmendur edhe rrethana që lidhen me çështjet pronësore të tij në fshatin Vitomiricë. Sipas dëshmive të paraqitura në gjykatë, ai kishte mosmarrëveshje me banorë lokalë dhe institucionet për të drejtën e pronësisë, ndërsa njëri nga dëshmitarët ka deklaruar se konflikti kishte nisur për shkak të pretendimeve se Gjokoviçi kishte zënë një pjesë të pronës së stërgjyshit të tij.

Procesi gjyqësor do të vazhdojë pas sigurimit të dëshmisë së kërkuar nga gjykata, ndërsa data e re për vazhdimin e seancës pritet të caktohet në vijim.