Rrugët e kontrabandës nga Serbia gjithnjë e më të bllokuara, Policia e Kosovës arreston një person për kontrabandë

Prishtinë, 19 korrik 2026 09:43

Një operacion i Policisë së Kosovës në komunën e Zubin Potokut ka rezultuar me parandalimin e një rasti të dyshuar të kontrabandës me mallra, duke dëshmuar vazhdimin e angazhimit të institucioneve të sigurisë për forcimin e sundimit të ligjit dhe luftimin e veprimtarive të kundërligjshme.

Sipas njoftimit të Policisë së Kosovës, rreth orës 03:38 të mëngjesit, njësitë policore gjatë patrullimit në fshatin Bube kanë vërejtur disa automjete të dyshuara. Pasi drejtuesit nuk iu janë bindur urdhrave për ndalim, zyrtarët policorë kanë vepruar në përputhje me autorizimet ligjore, duke përdorur armën zyrtare.

Gjatë operacionit është arrestuar një person, ndërsa është ndaluar një automjet i tipit VW Sharan, ku janë gjetur pije alkoolike dhe joalkoolike pa dokumentacion përcjellës, të dyshuara se ishin kontrabanduar nga Serbia në Republikën e Kosovës. Nga incidenti nuk është raportuar për persona të lënduar, thekson Policia e Kosovës, përcjell Veritasinfo.

Në vendin e ngjarjes kanë dalë njësitë e hetimeve dhe forenzikës, të cilat kanë kryer veprimet procedurale, ndërsa automjeti dhe mallrat janë sekuestruar si prova materiale.
Me urdhër të prokurorit të shtetit është iniciuar rasti për veprën penale “Kontrabandimi i mallrave”, ndërsa i dyshuari është ndaluar për 48 orë.
Ky operacion është pjesë e përpjekjeve të vazhdueshme të Policisë së Kosovës për të forcuar sundimin e ligjit, veçanërisht në zonat kufitare, duke reflektuar profesionalizmin dhe gatishmërinë e zyrtarëve policorë në parandalimin dhe goditjen e rrjeteve të kontrabandës.

Policia e Kosovës vlerëson se operacione të tilla kanë ndikuar në uljen e rasteve të kontrabandimit dhe në rritjen e kontrollit institucional, duke kontribuar në një mjedis më të sigurt dhe në mbrojtjen e rendit ligjor në vend.