Kosovë–SHBA bashkëpunim në hetimin e krimit kibernetik, arrestohet një person në Prizren

Prishtinë, 16 korrik 2026 17:04

Policia e Kosovës, në bashkëpunim me Prokurorinë Speciale të Republikës së Kosovës dhe autoritetet e Shteteve të Bashkuara të Amerikës, ka arrestuar një person të dyshuar për përfshirje në veprimtari të krimit kibernetik.

Sipas komunikatës së përbashkët të Policisë dhe Prokurorisë Speciale, Drejtoria e Hetimit të Krimeve Kibernetike ka zbatuar një urdhër të Gjykatës, duke kryer kontroll në një lokacion në rajonin e Prizrenit. Hetimet për këtë rast janë zhvilluar në koordinim me autoritetet amerikane, përcjell VeritasInfo.

Policia e Kosovës  bën të ditur se i dyshuari, me qëllim të përfitimit të kundërligjshëm, ka siguruar në mënyrë të paautorizuar të dhëna personale dhe të kartelave bankare, kryesisht të shtetasve të SHBA-së. Më pas, sipas hetimeve, këto të dhëna janë vendosur në platforma të caktuara online për t’u keqpërdorur.

I dyshuari është arrestuar dhe, me vendim të prokurorit, është ndaluar për 48 orë. Rasti është në fazën e hetimeve, ndërsa autoritetet kanë bërë të ditur se veprimet e mëtejshme do të ndërmerren në koordinim me autoritetet e Shteteve të Bashkuara.

Gjatë kontrollit në lokacionin e bastisur janë sekuestruar edhe prova materiale që konsiderohen të rëndësishme për procedurën hetimore.